Tempo de verán, de viaxes, paseos, festas e concertos… tempo ideal tamén para longas lecturas, e por suposto para as lecturas musicais –ao fin agora abundantes e variadas, como ben sabemos os lectores máis antigos–. Este número estival quere aproveitar humildemente ese oco de lectura con propostas diversas realizadas dende a nosa comunidade académica.
Neste senso, Symphonia supón xa un auténtico canal de intercambio consolidado no noso centro aínda que tamén serve, como imos ver, para comunicarnos co mundo musical “exterior”, que sorprendentemente parece bastante interesado nunha publicación dixital (unha máis entre miles). Symphonia é actualmente unha publicación dixital que chega, estatísticas de Google, a máis de cincuenta países distintos cun total de máis dezasete mil visitas no ano 2022 e unha media de máis de nove mil lectores por número!. Os nosos lectores son fundamentalmente de fala hispana e/ou portuguesa: España, Arxentina, México, Colombia, Brasil, Venezuela, Cuba, etc. Pero tamén nos coñecen en EEUU, Países Baixos, Irlanda, Francia, Reino Unido, Italia ou Alemaña entre outros. A nosa revista parece que é lida incluso por algún curioso nos confíns do mundo (Malasia, Indonesia ou Mongolia). O mundo é un pano.